Collecting knowledge For you !

ഇന്റർനെറ്റിൽ മലയാളം ഉപയോഗിക്കുന്നവർ ജോസഫ് ചേട്ടനെ അറിഞ്ഞേ തീരൂ.

By:
Posted: March 21, 2018
Category: Historical Places , World of Internet
Comments: 0
download palathully android app ! >>>> Get!

ഇന്റർനെറ്റിൽ മലയാളം ഉപയോഗിക്കുന്നവർ ജോസഫ് ചേട്ടനെ അറിഞ്ഞേ തീരൂ. വിക്കിനിഘണ്ടു, ഓളം തുടങ്ങി ഓൺലൈനിൽ ലഭ്യമായ മിക്കവാറും എല്ലാ മലയാളനിഘണ്ടുക്കളും അദ്ദേഹത്തിന്റെ രണ്ടു വർഷത്തിനുമേലുള്ള ഒറ്റയ്ക്കുള്ള, തുടർച്ചയായ അദ്ധ്വാനത്തിന്റെ ഫലമാണു്.
20 വർഷം മുമ്പ് അദ്ദേഹം തന്റെ പുതിയ കമ്പ്യൂട്ടറിൽ രാവിലെമുതൽ രാത്രി വരെ എല്ലാ ദിവസവും മാധുരി എന്ന കൊച്ചു സോഫ്റ്റ്‌വെയറും Keralite.ttf എന്ന ആദ്യകാല ASCII മലയാളം ഫോണ്ടും ഉപയോഗിച്ചു ടൈപ്പുചെയ്തുണ്ടാക്കിയതാണു് കഷ്ടി ഒരു ലക്ഷം വാക്കുകളുള്ള, കേരളഭാഷാനിഘണ്ടുവിന്റെ ആ മൂലപ്രതി.

അന്നു്, അദ്ദേഹത്തിന്റെ ആ ഭഗീരഥപ്രയത്നത്തിനു് വിനീതപ്രചോദനം നൽകാൻ കഴിഞ്ഞതാണു് ഇന്റർനെറ്റ് മലയാളസമൂഹത്തിനുവേണ്ടി ചെയ്തു എന്നു ഞാനഭിമാനിക്കുന്നതിൽ വെച്ച് ഏറ്റവും മികച്ച സംഭാവന.

എന്നാൽ ദത്തുൿ (മലേഷ്യൻ ഗവണ്മെന്റ് പുരസ്കരിക്കുന്ന ഒരു അത്യുന്നതബഹുമതിയാണു് ദത്തുൿ എന്ന നാമം) എന്ന സ്ഥിരോത്സാഹിയ്ക്കു് അദ്ദേഹത്തിന്റെ എണ്ണമറ്റ നേട്ടങ്ങളിൽ അതു് ഒന്നുമാത്രമായിരുന്നു.

12-ആമത്തെ വയസ്സിൽ ക്വിറ്റ് ഇന്ത്യാ സമരത്തിൽ പങ്കെടുത്തതുമുതൽ ആ വിജയഗാഥ തുടങ്ങുന്നു. കേരളത്തിലെ ഏറ്റവും ആദ്യത്തെ അമേച്ച്വർ റേഡിയോ ഹോബിയിസ്റ്റുകളിൽ ഒരാളായിരുന്നു ജോസഫ് ചേട്ടൻ. എറണാകുളം മഹാരാജാസിൽ ഫിസിക്സ് ബിരുദപഠനത്തിനിടെ ഫിസിക്സ് അസോസിയേഷന്‍, ഫോട്ടോഗ്രാഫി ക്ലബ്ബ്, സോഷ്യല്‍ സെര്‍വീസ് ക്ലബ്ബ് തുടങ്ങിയ പ്രസ്ഥാനങ്ങള്‍ക്കും അദ്ദേഹം നിര്‍ണ്ണായകമായ നേതൃത്വം നല്‍കി.
പില്‍ക്കാലത്ത് തിരുവനന്തപുരം ടീച്ചേര്‍സ് ട്രെയിനിങ്ങ് കോളേജില്‍ B.Edനു പഠിക്കുന്ന സമയത്ത് അദ്ദേഹം കേരളത്തിലെ എല്ലാ B.Ed. വിദ്യാര്‍ഥികള്‍ക്കും നേതൃത്വം കൊടുത്തുകൊണ്ട് പ്രസിദ്ധമായ വിമോചനസമരത്തില്‍ പങ്കെടുക്കുകയുണ്ടായി.

1959-ല്‍ മലേഷ്യയിലെ ( അന്ന് North Borneo) സബാ പ്രവിശ്യയില്‍ പുതുതായി തുടങ്ങിയ La Salle വിദ്യാലയത്തില്‍ പ്രത്യേക ക്ഷണമനുസരിച്ച് ശാസ്ത്രാദ്ധ്യാപകനായി KJ ജോസഫ് തന്റെ പ്രവാസജീവിതം ആരംഭിച്ചു. തുടര്‍ന്ന് സബാ ടീച്ചേര്‍സ് യൂണിയന്‍, സബാ ഇന്ത്യന്‍ കോണ്‍ഗ്രസ്സ് തുടങ്ങിയ സംഘടനകള്‍ സ്ഥാപിച്ചു. മലേഷ്യന്‍ ഭാരതീയര്‍ക്ക് അനിഷേധ്യനേതാവായിത്തീര്‍ന്ന അദ്ദേഹം 1974ല്‍ തന്റെ ഉന്നതമായ ഔദ്യോഗികപദവി രാജിവെച്ച് ബിസിനസ്സിലേക്കു കാലുവെച്ചു.

പ്രവര്‍ത്തനനിരതമായ തന്റെ കര്‍മ്മപഥത്തില്‍ സബാ ഷിപ്പ് യാര്‍ഡ് ചെയര്‍മാന്‍, മലേഷ്യ സ്റ്റേറ്റ് ഇന്‍‌ക്വയറി കമ്മീഷന്‍ മെമ്പര്‍, സബാ അലയന്‍സ് പാര്‍ട്ടി സെക്രട്ടറി ജനറല്‍ തുടങ്ങിയ ഉന്നതപദവികളും അദ്ദേഹത്തെ തേടിയെത്തിയിട്ടുണ്ട്.

കമ്പ്യൂട്ടറുകള്‍ പ്രചാരത്തിലായ ആദ്യനാളുകളില്‍ തന്നെ അതില്‍ മലയാളഭാഷയുടെ സന്നിവേശത്തിന്റെ ആവശ്യത്തെക്കുറിച്ച് ഒരു സാധാരണ മലയാളിയേക്കാളും വളരെയധികം ബോധവാനായിത്തീര്‍ന്നു അദ്ദേഹം. തന്റെ കമ്പ്യൂട്ടര്‍ വിജ്ഞാനം വളരെ പരിമിതമായിരുന്നിട്ടുപോലും, ഇരുപതുവർഷം മുന്‍പ് മുതല്‍, വിലപ്പെട്ടുവീണുകിട്ടിയ വിശ്രമസമയം മുഴുവനായിത്തന്നെ ദത്തുക് മലയാളത്തിനു വേണ്ടി ചെലവഴിച്ചു. മറ്റാരുടേയും സഹായം കാത്തുനില്‍ക്കാതെ, സ്വന്തം അദ്ധ്വാനത്തിലൂടെ മാത്രം, പല വര്‍ഷങ്ങള്‍ പരിശ്രമിച്ചാണു് ജോസഫ് ചേട്ടന്‍ ബൃഹത്തായ കേരളഭാഷാനിഘണ്ടുവും ചങ്ങമ്പുഴയുടെ സമ്പൂര്‍ണ്ണകൃതികളടക്കം ധാരാളം ഗ്രന്ഥങ്ങളും ടൈപ്പുചെയ്ത് കമ്പ്യൂട്ടറിലാക്കിയതു്.

കേജേ എന്നുകൂടി സ്നേഹാദരപൂര്‍വ്വം വിളിക്കപ്പെടുന്ന അദ്ദേഹം ടൈപ്പുചെയ്തു തയ്യാറാക്കിയ കൃതികളില്‍ ഒരു ഭാഗം ഇന്നു് വിക്കി ഗ്രന്ഥശാലയിലും സൗജന്യമായി ആർക്കും ലഭ്യമാണു്.

http://datukkj.blogspot.in/2006/04/blog-post_114544219785730299.html

 

ഫോട്ടോ : എന്റെ സതീർഥ്യയും സുഹൃത്തുമായ മേരി ആൻ അവളുടെ അമ്മാവനായ, എനിക്കു ഗുരുതുല്യനായ ദത്തുൿ ജോസഫ് ചേട്ടനെ മലേഷ്യയിലെ കോട്ട കിനബാലുവിൽ സന്ദർശിച്ചപ്പോൾ.

Share The knowledge !

Related Posts