Collecting knowledge For you !

ചിൻ ഷി ഹുവാങ് (Qin Shi Huang ) : പ്രപഞ്ചാവസാനം വരെ ഭരണത്തിലിരിക്കാൻ ആഗ്രഹിച്ച ചൈനീസ് ചക്രവർത്തി

By:
Posted: March 23, 2018
Category: Historical Figures
Comments: 0
download palathully android app ! >>>> Get!

ഭാരതത്തിലെ മൗര്യ സാമ്രാജ്യത്തിന്റെ കാലത്താണ് ചൈന എന്ന സങ്കല്പം തന്നെ രൂപം കൊള്ളുന്നത് . ചൈനയിലെ ചിൻ രാജവംശത്തിലെ ( Qin dynasty ) ആദ്യ ഭരണാധികാരിയായിരുന്ന ചിൻ ഷി ഹുവാങ് ( Qin Shi Huang) ഇന്റെ പേര് ആണ് ചൈന എന്ന രാജ്യം വഹിക്കുന്നത് . ബി സി ഇ 230 മുതൽ 210 വരെ ഇന്നത്തെ ചൈനയുടെ അഞ്ചിലൊന്ന് പോലുമില്ലാത്ത ചൈനയുടെ ചക്രവർത്തിയായിരുന്നു ചിൻ ഷി ഹുവാങ് .വളരെ സങ്കീർണമായ ഒരു വ്യക്തിത്വമായിരുന്നു ചിൻ ഷി ഹുവാങ് ഇന്റേത്. ചൈന എന്ന രാജ്യത്തിന് തുടക്കമിട്ടതും കൈയേറ്റങ്ങളിലൂടെയും വംശ ഉന്മൂലനങ്ങളിലൂടെയും ആ രാജ്യത്തിന് ഒരു വലിയ ഭൂപ്രദേശം സ്വന്തമായി ഉണ്ടാക്കിയെടുക്കുകയും ചെയ്ത വ്യക്തി എന്ന നിലയിൽ ചിരിത്രത്തിൽ ചിൻ ഷി ഹുവാങിന്റെ സ്ഥാനം വലുതാണ് . എന്നാൽ അതിക്രൂരനും അതേസമയം എല്ലാക്കാലത്തും ജീവിക്കാനായുള്ള പ്രവർത്തനങ്ങളിൽ ജീവിതം ഉഴിഞ്ഞു വച്ച ഒരു വ്യക്തി യുമായിരുന്നു ചിൻ ഷി ഹുവാങ് .
,
ചിൻ രാജവംശത്തിനുമുന്പുള്ള ചൈനയെ നാട്ടുരാജ്യങ്ങളായ ഷാങ്ങും ഷാവൊയുമൊക്കെ ആണ് ഭരിച്ചിരുന്നത് ചെറുകിട രാജ്യങ്ങളായിരുന്നു അവയൊക്കെ . അവരിൽ നിന്നൊക്കെ വ്യത്യസ്തനായി വലിയ ഭൂപ്രദേശം കീഴ്‌പ്പെടുത്തി ആദ്യ ചക്രവർത്തി ( huángdì ) ആയി സ്വയം പ്രഖ്യാപിച്ചത് ചിൻ ഷി ഹുവാങ് ആയിരുന്നു .( ആദ്യ പേര് യിങ് ഷെങ് (Ying Zheng ) ആദ്യ ചക്രവർത്തി എന്ന തന്റെ സ്ഥാനം ഉറപ്പിക്കാനായി മുൻ രാജാക്കന്മാരുടെയെല്ലാം ചരിത്രം പ്രതിപാദിക്കുന്ന ലിഖിതങ്ങളും ഗ്രന്ഥങ്ങളുമെല്ലാം ചുട്ടെരിച്ചുകൊണ്ടായിരുന്നു ചിൻ ഷി ഹുവാങിന്റെ തുടക്കം .
.
ചൈനയുടെ ചരിത്രത്തിൽ ഒരു വലിയ സൈന്യത്തെ രൂപീകരിച്ചത് ചിൻ ഷി ഹുവാങ് ആയിരുന്നു .ആയുധങ്ങളുടെ കാര്യത്തിലും ചിൻ സൈന്യം പിറകിൽ ആയിരുന്നില്ല . വെങ്കലത്തിലും ,ഇരുമ്പിലും തീർത്ത ആയുധങ്ങളാൽ സു സജ്ജമായിരുന്നു ചിൻ സൈന്യം . ഈ സൈന്യവും ആയുധശേഷിയും ഹുവാങിനെ തൃപ്തനാക്കിയില്ല . രാജ്യത്തിന്റെ പടിഞ്ഞാറേ അതിർത്തിയിൽ ഒരു വൻ മതിൽ കെട്ടിയാലേ രാജ്യം സുരക്ഷിതമാകൂ എന്ന് ഹുവാങ് തീരുമാനിച്ചു . നൂറ്റാണ്ടുകൾ നീണ്ടുനിന്ന വന്മതിൽ നിർമാണം ഹുവാങ് ആണ് തുടങ്ങി വച്ചത് . ചിൻ ഷി ഹുവാങിന്റെ കാലത്തെ വന്മതിൽ നിര്മാണത്തിനിടക്ക് എത്ര ലക്ഷം ആളുകൾ മരിച്ചു എന്നതിന് കണക്കില്ല . ആഹാരം പോലുമില്ലാതെ പണിയെടുത്തു മരിച്ചുവീണ ചൈനീസ് കർഷകരുടെ മൃതദേഹങ്ങളെ വൻമതിലിന്റെ ഭാഗമാക്കി മാറ്റുകയാണ് ചിൻ ഭരണകൂടം ചെയ്തത് .
.
രാജ്യത്തെ ഗ്രന്ഥങ്ങളെല്ലാം അഗ്നിക്കിരയാക്കിയതിനൊപ്പം പണ്ഡിതന്മാരെയും കവികളെയുമെല്ലാം ഹുവാങ് വധിച്ചു . പിന്നീട് സ്വന്തം കുടുംബത്തിലേക്കായി ചിൻ ഷി ഹുവാങിന്റെ നോട്ടം . സ്വന്തം അമ്മയായ ഷാവോ ജി യെ (Zhao Ji ) തടവിലാക്കുകയും ,സ്വ സഹോദങ്ങളെയെല്ലാം വധിക്കുകയും ചെയ്ത ആദ്യ ചക്രവർത്തി അധികാരത്തിൽ ചോദ്യം ചെയ്യാത്തവനായി , സിംഹാസനത്തിൽ അമർന്നിരുന്നു . ഇടക്ക് കലാപക്കൊടി ഉയർത്തിയ ബന്ധുക്കളെയെല്ലാം ഒന്നൊന്നായി വധിച്ചു. അങ്ങനെ ഒരെതിർപ്പുമില്ലാതെ അക്കാലത്തെ ചൈനയുടെ ചക്രവർത്തി ആയി വിരാജിക്കുമ്പോളാണ് ചിൻ ഷി ഹുവാങിന് അമരത്വം നേടണമെന്ന ചിന്തയുണ്ടായത് . മരിച്ചാൽ താൻ വധിച്ച മനുഷ്യർ നരകത്തിൽ വച്ച് പ്രതികാരം ചെയ്യുമെന്ന ഭീതിയാണ് അമരത്വം നേടാനുളള വഴികൾ ആലോചിക്കാൻ ഷി ഹുവാങിനെ പ്രേരിപ്പിച്ചത്.
.
ചൈനക്ക് സമീപമുള്ള ഷിഫു ദ്വീപുകളിൽ അമരത്വം നൽകുന്ന ഫലം കായ്ക്കുന്ന ചെടികൾ ഉണ്ടെന്നു ധരിച്ച ചിൻ പല തവണ ആ ദ്വീപിലെത്തി കാണുന്ന ഫലങ്ങളൊക്കെ പറിച്ചു തിന്നു . അതൊന്നും കൊണ്ട് അമരത്വം ലഭിക്കില്ല എന്ന് മനസ്സിലാക്കിയ ചിൻ പിന്നീട് ''അമരനായ '' മാന്ത്രികൻ അംഖി ( Anqi ) യെത്തേടി വൻ കപ്പൽ പടകളെത്തന്നെ അയച്ചു .മരുന്ന് തേടിയും മാന്തികനെത്തേടിയും പുറപ്പെട്ട സൈന്യങ്ങളൊന്നും തിരിച്ചു വന്നില്ല. അതിനിടക്ക് ചില വിരുതന്മാരായ കൊട്ടാരം വൈദ്യന്മാർ അമരത്വം നേടാനുള്ള മരുന്ന് എന്ന വ്യാജേന വലിയ അളവിൽ രസം (mercury ) കലർന്ന ഗുളികകൾ ചിൻ ഹുവാങിന് നൽകി . അത് കഴിച്ചാൽ അമരത്വം കിട്ടുമെന്ന് കരുതിയ ചക്രവർത്തി രസം കലർന്ന ഗുളികകൾ ആർത്തിയോടെ വാരി വിഴുങ്ങി . അതോടെ പരിധിയിൽ കൂടുതൽ രസം ശരീരത്തിലെത്തിയാലുണ്ടാവുന്ന മെർക്കുറി പോയ്സനിങ്ങിലേക്ക് (mercury poisoning ) ഹുവാങ് വഴുതിവീണു .അതിന്റെ അനന്തരഫലമായി മനോനിലതെറ്റിയ ചിൻ രാജ്യം ചുറ്റിക്കാണാൻ പുറപ്പെട്ടു .ആ ചുറ്റിക്കറക്കത്തിനിടക്ക് ചിൻ മരണപ്പെട്ടു .ചക്രവർത്തി മരിച്ചു എന്ന് പറയാൻ ആർക്കും ധൈര്യം ഉണ്ടായില്ല . ദുർഗന്ധം വമിക്കാൻ തുടങ്ങിയപ്പോൾ ചക്രവർത്തിയുടെ പല്ലക്കിനു ചുറ്റും മീൻ നിറച്ച കാളവണ്ടികൾ നടത്തി ആ ദുർഗന്ധം മറച്ചുവെക്കാൻ ശ്രമിച്ചു . അതും പോരാതെവന്നപ്പോൾ മരണത്തിൽനിന്നു തിരിച്ചു വരാനായി ജീർണിച്ച മൃതദേഹം മെർക്കുറി നിറച്ച ഒരു വലിയ ശവകുടീരത്തിനുള്ളിൽ അടക്കം ചെയ്യപ്പെട്ടു .
.
അതിനു ശേഷമുള്ള എല്ലാ ചൈനീസ് ഏകാധിപതികളുടെയും വീരപുരുഷനാണ് ചിൻ ഷി ഹുവാങ് .ചിൻ 460 പണ്ഡിതരെ ജീവനോടെ കുഴിച്ചിട്ടപ്പോൾ താൻ നാല്പത്താറായിരം പണ്ഡിതരെ ജീവനോടെ കുഴിച്ചുമൂടിയിട്ടുണ്ടെന്ന് ചൈനീസ് ഏകാധിപതി മാവോ പ്രസ്താവിച്ചിട്ടുണ്ട്

"He buried 460 scholars alive; we have buried forty-six thousand scholars alive... You [intellectuals] revile us for being Qin Shi Huangs. You are wrong. We have surpassed Qin Shi Huang a hundredfold. When you berate us for imitating his despotism, we are happy to agree! ''
.
ചിൻ ഷി ഹുവാങിന്റെ മരണത്തിനു മാസങ്ങൾക്കു ശേഷം ചൈനീസ് കർഷകർ ചിൻ കൊട്ടാരങ്ങളിലേക്ക് ഇരച്ചുകയറി . രണ്ടാമത്തെ ചക്രവർത്തി യും ചിന്നിന്റെ പുത്രനുമായ ചിൻ ഏർ ഷി ( Qin Er Shi) ക്രൂരതയിൽ പിതാവിനെ കവച്ചുവച്ചുകൊണ്ട് കലാപങ്ങൾ അടിച്ചമ ർത്താൻ ശ്രമിച്ചു . ഒടുവിൽ ജനകീയ ചെറുത്തുനിൽപ്പ് വിജയം കണ്ടു . ജനം ചിൻ ഏർ ഷി യെ വധിച്ചില്ല ആത്മഹത്യ ചെയ്യാനുള്ള അവസരം നൽകി അവർ ചിൻ ഏർ ഷി യെ '' ആദരിച്ചു '' .ആദ്യ ചക്രവർത്തിയുടെ പിന്തുടർച്ചാവകാശിയെയും ബന്ധുക്കളെയും ആദ്യ ചക്രവർത്തിയുടെ മരണത്തിനു രണ്ടു വർഷങ്ങൾക്കുള്ളിൽ ചൈനീസ് ജനത കാലപുരിക്കയച്ചു . അതായിരുന്നു അമരനായിരിക്കാൻ കൊതിച്ച ഷിഹുവാങിനും പിന്മുറക്കാർക്കും കാലം കാത്തുവച്ചിരുന്ന വിധി.
--
ചിത്രങ്ങൾ: ചിൻ ഷി ഹുവാങ് , ചിൻ ഷി ഹുവാങ് ഇന്റെ ചൈന ,അമൃത് തിരഞ്ഞു പോകുന്ന ചിൻ ഷി ഹുവാങ് ഇന്റെ കപ്പൽ ഒരു പെയിന്റിംഗ് ചിത്രങ്ങൾ കടപ്പാട് വിക്കിമീഡിയ കോമൺസ്.
--
Ref
1. http://www.ancient-origins.net/…/ruthless-chinese-emperor-q…
2. http://www.bbc.com/news/magazine-19922863
3. http://www.vision.org/…/history-shi-huang-emperor…/5818.aspx

Share The knowledge !

Related Posts

Leave a Reply

Your email address will not be published. Required fields are marked *