ജീവന്‍ അത്‌ ചൊവ്വയിലും യൂറോപയിലുമായിരിക്കില്ല !

Share the Knowledge

നാസയുടെ കെപ്ലര്‍ സ്‌പേസ് ക്രാഫ്റ്റിന്റെ സഹായത്തോടെ സൗരയുഥത്തിന് വെളിയില്‍ ഇതുവരെ 398 നക്ഷത്ര കുടുമബങ്ങളിലുള്ള 1715 അന്യഗ്രഹങ്ങളെ കണ്ടെത്തിക്കഴിഞ്ഞിട്ടുണ്ട്. കെപഌ സ്‌പേസ് ക്രാഫ്റ്റിന്റെ പ്രവര്‍ത്തനം അവസാനിച്ചെങ്കിലും അതില്‍ നിന്ന് ലഭിച്ച ഡാറ്റകള്‍ ഇതുവരെ പൂര്‍ണമായി അപഗ്രഥിച്ചുകഴിഞ്ഞിട്ടില്ല. എന്നാല്‍ അന്യഗ്രഹങ്ങളുടെ(exoplanets) എണ്ണം ഇതൊന്നുമല്ല. ക്ഷീരപഥത്തില്‍ മാത്രം 20,000 കോടിയില്‍ പരം നക്ഷത്രങ്ങളുണ്ട്. ഇവയില്‍ 20 ശതമാനം നക്ഷത്രങ്ങള്‍ക്ക് ചുറ്റും ഗ്രഹരൂപീകരണം നടന്നിട്ടുണ്ടാകും. അങ്ങനെ വരുമ്പോള്‍ ക്ഷീരപഥത്തില്‍ മാത്രം കോടിക്കണക്കിന് ഗ്രഹങ്ങളുണ്ടാകും. ഈ ഗ്രഹങ്ങളില്‍ 20 ശതമാനം ഭൗമസമാനമായിരിക്കും.

മാതൃനക്ഷത്രത്തില്‍ നിന്നുള്ള അകലവും വലിപ്പവും ഘടനയും ഉപരിതല-അന്തരീക്ഷ സ്ഥിതിയും ഭൂമിയുടേതിന് തുല്യമായിരിക്കും എന്നാണ് ഭൗമസമാനം എന്ന വാക്കുകൊണ്ട് ഉദ്ദേശിക്കുന്നത്. ഈ സ്ഥിതി വിവരക്കണക്കനുസരിച്ച് ക്ഷീരപഥത്തിലെ ഭൗമ സമാന-വാസയോഗ്യ ഗ്രഹങ്ങളുടെ എണ്ണവും കോടിക്കണക്കിനുണ്ട്. ക്ഷീരപഥം പോലെയുള്ള ശതകോടിക്കണക്കിന് ഗാലക്‌സികള്‍ പ്രപഞ്ചത്തിലുണ്ട്. അങ്ങനെ വരുമ്പോള്‍ ഭൂമിയെപ്പോലെ നിരവധി, എണ്ണിയാലൊടുങ്ങാത്ത അത്രയും ഭൂമികള്‍ പ്രപഞ്ചത്തിലുണ്ട്. എന്നാല്‍ പ്രകാശവര്‍ഷങ്ങള്‍ക്കകലെയുള്ള അത്തരം ഗ്രഹങ്ങളിലേക്കുള്ള യാത്ര ഇന്നത്തെ സാങ്കേതിക വിദ്യയില്‍ അസാധ്യമാണ്. ശക്തമായ ഭൂതല, ബഹിരാകാശ ദൂരദര്‍ശിനികളടെ സഹായത്തോടെയാണ് ശാസ്ത്രജ്ഞര്‍ അന്യഗ്രഹ വേട്ട നടത്തുന്നത്. കെപഌ സ്‌പേസ് ക്രാഫ്റ്റ് ഇത്തരത്തില്‍പ്പെട്ട ഒരു ബഹിരാകാശ ദൂരദര്‍ശിനിയാണ്. 2013ലാണ് കെപഌ ദൗത്യം അവസാനിച്ചത്.

കെപഌ അവസാനിപ്പിച്ചിടത്തുനിന്നും നാസ വീണ്ടും ആരംഭിക്കുകയാണ്. 2017, 2018 വര്‍ഷങ്ങളില്‍ നാസ വിക്ഷേപിക്കുന്ന രണ്ട് ബഹിരാകാശ ദൂരദര്‍ശിനികള്‍ ക്ഷീരപഥത്തിലെ ഭൗമസമാന ഗ്രഹങ്ങളില്‍ ജീവന്‍ കണ്ടെത്തുമെന്ന് തന്നെയാണ് നാസ അവകാപ്പെടുന്നത്. 2017ല്‍ നാസ വിക്ഷേപിക്കുന്ന ടെസ് (Transiting Exoplanet Survey Satellite-TESS) കെപഌ സ്‌പേസ് ക്രാഫ്റ്റിന്റെ അപ്‌ഗ്രേഡ് ചെയ്ത വെര്‍ഷനാണ്. അതേ തുടര്‍ന്ന് 2018ല്‍ വിക്ഷേപിക്കുന്ന ജെയിംസ് വെബ് സ്‌പേസ് ടെലസ്‌കോപ്പ് (JWST) ഹബിള്‍ ടെലസ്‌കോപ്പിന്റെ പിന്‍ഗാമിയെന്നാണ് അറിയപ്പെടുന്നത്. ഈ രണ്ട് ദൂരദര്‍ശിനികളുമായി താരതമ്യം ചെയ്യുമ്പോള്‍ ഹബിളും കെപഌും വെറും കളിപ്പാട്ടങ്ങളായിരിക്കും !

ടെസ് (Transiting Exoplanet Survey Satellite-TESS)

ടെസിന്റെ നിരീക്ഷണ പരിധി കെപഌ സ്‌പേസ് ക്രാഫ്റ്റിന്റെ നാല്‍പ്പത് മടങ്ങാണ്. കെപഌ ചെയ്തതുപോലെഗ്രഹ സംതരണ വിദ്യ (Transit method) ഉപയോഗിച്ചുതന്നെയാണ് ടെസ് അന്യഗ്രഹ വേട്ട നടത്തുന്നത്. എന്നാല്‍ സംതരണ വിദ്യ ഉപയോഗിച്ച് കണ്ടെത്തുന്ന ഗ്രഹങ്ങളുടെ ഭ്രമണപഥം, പിണ്ഡം, സാന്ദ്രത, അന്തരീക്ഷ ഘടന എന്നിവയെല്ലാം തിരിച്ചറിയാന്‍ കഴിയുന്ന അനുബന്ധ ഉപകരണങ്ങള്‍ ടെസിലുണ്ട്. ഭൂമിയെക്കാള്‍ വലിപ്പം കുറഞ്ഞ ഗ്രഹങ്ങളെ വരെ കണ്ടെത്താന്‍ ടെസിന്റെ കണ്ണുകള്‍ക്ക് കഴിയും. 2017 August ലാണ് ഈ ബഹിരാകാശ ദൂരദര്‍ശിനി വിക്ഷേപിക്കുന്നത്.

ജെയിംസ് വെബ് സ്‌പേസ് ടെലസ്‌ക്കോപ്പ് (JWST)

ദൃശ്യപ്രകാശത്തിലും ഇന്‍ഫ്രാറെഡ് വെവ്ബാന്‍ഡിലും പ്രവര്‍ത്തിക്കുന്ന ജെ.ഡബ്ല്യു,എസ്.ടിയിലുള്ള സ്‌പെക്‌ട്രോമീറ്ററുകള്‍ അന്യഗ്രഹജീവികളെ തിരഞ്ഞുപിടിക്കുമെന്നുമാത്രമല്ല ഏതെങ്കിലുമൊരു കാലത്ത് അവിടെ ജീവനുണ്ടായിരുന്നോ എന്ന് കണ്ടുപിടിക്കുകയും ചെയ്യും. ഗ്രഹാന്തരീക്ഷത്തിലുള്ള മീഥേയ്ന്‍ പോലെയുള്ള കാര്‍ബണിക സംയുക്തങ്ങളുടെ സാന്നിദ്ധ്യം തിരിച്ചറിയുന്നതിലൂടെയാണ് ഇത് സാധ്യമാകുന്നത്. അന്യഗ്രഹവേട്ട മാത്രമല്ല ജെ.ഡബ്ല്യു.എസ.്ടി യുടെ ലക്ഷ്യം. ഭൂമിയില്‍ നിന്നും 1300 കോടി പ്രകാശവര്‍ഷം അകലെ ശൈശവ പ്രപഞ്ചത്തിലെ ആദ്യ നക്ഷത്ര സമൂഹങ്ങളിലേക്ക് തുറന്ന് പിടിച്ചിരിക്കുന്ന കണ്ണുകളാണ് ഈ ബഹിരാകാശ ദൂരദര്‍ശിനി. 2018ല്‍ വിക്ഷേപിക്കുന്ന ഈ ദൂരദര്‍ശിനിയുടെ ചെലവ് 880 കോടി ഡോളറാണ്.

കെപഌ സ്‌പേസ് ക്രാഫ്റ്റും ഗ്രഹണസംതരണ വിദ്യയും

സൗരയുഥത്തിന് വെളിയില്‍ മറ്റ് നക്ഷത്ര കുടുംബങ്ങളിലുള്ള ഭൗമ സമാനഗ്രഹങ്ങളെ കണ്ടെത്തുന്നതിനായി 2009 മാര്‍ച്ച് ഏഴിന് നാസ വിക്ഷേപിച്ച ബഹിരാകാശ ദൂരദര്‍ശിനിയാണ് കെപഌ സ്‌പേസ് ക്രാഫ്റ്റ്. 1039 കിലോഗ്രാം ഭാരമുള്ള ഈ സ്‌പേസ് ക്രാഫ്റ്റ് ക്ഷീരപഥത്തിലെ സിഗ്‌നസ്, ലൈറ, ഡ്രാക്കോ എന്നീ നക്ഷത്ര രാശികളില്‍പ്പെട്ട 1,45,000 നക്ഷത്രങ്ങളെയാണ് നിരീക്ഷിക്കുന്നത്. വടക്കന്‍ ചക്രവാളത്തിലാണ് ഈ നക്ഷത്ര രാശികള്‍. ഈ താരാഗണങ്ങള്‍ ഭൂമിയുടെ എലിപ്ടിക്കല്‍ പ്ലെയിനില്‍ നിന്ന് പുറത്തായതുകൊണ്ട് സൂര്യപ്രകാശം സൃഷ്ടിക്കുന്ന തടസങ്ങില്‍ നിന്ന് അകന്നുനിന്നുകൊണ്ട് സൂക്ഷ്മതയോടെ വിവരങ്ങള്‍ ശേഖരിക്കാന്‍ കെപഌിന്കഴിയും. ഗ്രഹസംതരണവിദ്യ ഉപയോഗിച്ചാണ് കെപഌ അന്യഗ്രഹവേട്ട നടത്തുന്നത്. നക്ഷത്ര ബിംബത്തിനും സ്‌പേസ് ക്രാഫ്റ്റിനുമിടയിലൂടെ ഏതെങ്കിലും ഒരു അതാര്യവസ്തു കടന്നുപോകുമ്പോള്‍ നക്ഷത്രശോഭയിലുണ്ടാകുന്ന നേരിയ വ്യതിയാനം കണക്കുകൂട്ടി അതാര്യവസ്തുവിന്റ അകൃതിയും വലിപ്പവും പിണ്ഡവും കണ്ടെത്തുന്ന രീതിയാണിത്.

സംതരണ രീതിയുടെ പരിമിതികള്‍

വ്യാഴത്തേപ്പോലെയുള്ള വലിയ ഗ്രഹങ്ങളെയാണ് ഈ രീതിയില്‍ കൂടുതലും കണ്ടെത്താന്‍ കഴിയുന്നത്. അവയാകട്ടെ വാതക ഗോളങ്ങളുമായിരിക്കും. ഒരു ഗ്രഹം വാസയോഗ്യമാണെന്നു തീരുമാനിക്കുന്നതിന് ഗ്രഹത്തിന്റെ വലിപ്പം, പിണ്ഡം, ഭ്രമണപഥത്തിന്റെ സവിശേഷതകള്‍, മാതൃനക്ഷത്രത്തില്‍ നിന്നുള്ള അകലം, അന്തരീക്ഷ ഘടന എന്നിവയെല്ലാം പരിഗണിക്കണം. ഭൂമിയേപ്പോലെയുള്ള ചെറിയ ഗ്രഹങ്ങളിലാണ് പൊതുവെ ജീവന്‍ ഉത്ഭവിക്കുന്നതിനും വികസിക്കുന്നതിനും സാഹചര്യങ്ങളുള്ളത് എന്നാണ് പൊതുവെയുള്ള ധാരണ. സംതരണ വിദ്യ ഉപയോഗിച്ചുള്ള അന്യഗ്രഹവേട്ടയില്‍ ഭൗമസമാനഗ്രഹങ്ങളെ കണ്ടെത്താനുള്ള സാധ്യത കുറവാണ്. തെറ്റുണ്ടാകാനുള്ള സാധ്യത 35 ശതമാനത്തില്‍ കൂടുതലുമാണ്. മറ്റൊരു പ്രധാന പരിമിതി സംതരണ വിദ്യ ഉപയോഗിച്ച് ചെറിയ ഗ്രഹങ്ങളെ കണ്ടെത്തിയാല്‍ തന്നെ അവയുടെ അന്തരീക്ഷ ഘടന മനസിലാക്കാന്‍ കഴിയില്ല എന്നതാണ്. ഒരു ഗ്രഹം വാസയോഗ്യമാണോ എന്നു നിര്‍ണയിക്കുന്നതില്‍ ഗ്രഹാന്തരീക്ഷത്തിന് വലിയ പങ്കുണ്ട്. ഈ പരിമിതികളെല്ലാം മറികടക്കുകയാണ് നാസയുടെ ടെസും, ജെയിംസ് വെബ് സ്‌പേസ് ടെലസ്‌കോപ്പും.

എക്‌സോപ്ലാനറ്റുകള്‍

സൗരയുഥത്തിന് വെളിയില്‍ മറ്റ് നക്ഷത്രകുടുംബങ്ങളിലോ സ്വതന്ത്രമായി സ്‌പേസില്‍ അലഞ്ഞുനടക്കുകയോ ചെയ്യുന്ന ഗ്രഹങ്ങളാണ് എക്‌സോപ്ലാനറ്റുകള്‍ അഥവ അന്യഗ്രഹങ്ങള്‍. ഭൂമിയെക്കാള്‍ വലിയ അന്യഗ്രഹങ്ങളാണ് ഇതുവരെ കണ്ടെത്തിയതില്‍ ഭൂരിഭാഗവും. അല്‍ഫാസെന്റോറി Bb, സൂര്യന്റെ തൊട്ടടുത്ത നക്ഷത്ര ത്രയമായ അല്‍ഫാസെന്റോറി വ്യൂഹത്തില്‍ കണ്ടെത്തിയ അന്യഗ്രഹമാണ്. സൂര്യനില്‍ നിന്നും 4.3 പ്രകാശവര്‍ഷം അകലെയാണിത്.

വാസയോഗ്യമേഖല (Habitable zone)

ഒരു ഗ്രഹവും അതിന്റെ മാതൃനക്ഷത്രവും തമ്മിലുള്ള അകലം സൂചിപ്പിക്കുന്ന തോതാണിത്. ജലം ദ്രാവകാവസ്ഥയില്‍ നിലനില്‍ക്കുന്ന മേഖല എന്നുപറയാം. നക്ഷത്രത്തിന്റെ ശോഭ, താപനില, വലിപ്പം, പിണ്ഡം, ന്യൂക്ലിയര്‍ പ്രവര്‍ത്തനങ്ങലൂടെ തീവ്രത എന്നിവക്കനുസരിച്ച് വാസയോഗ്യമേഖല വ്യത്യാസപ്പെട്ടിരിക്കും. സൂര്യന്റെ വാസയോഗ്യമേഖല 12 കോടി കിലോമീറ്ററിനും 22 കോടി കിലോമീറ്ററിനും ഇടയിലാണ്. ഭൂമി സൂര്യനില്‍ നിന്നും 15 കോടി കിലോമീറ്റര്‍ അകലെയാണെന്ന് ഓര്‍ക്കുക.

by സബ് ജോസ്

Image

ഒരു അഭിപ്രായം പറയൂ