നിയാണ്ടര്‍ത്താലുകളും ശിലായുഗത്തിന്‍റെ അതിജീവനയുദ്ധവും

നാം ഇന്നേറെ അഭിമാനിച്ചും അതിലേറെ അഹങ്കരിച്ചും അലങ്കരിച്ചുപോരുന്ന ഒരു സ്ഥാനമുണ്ട്. ഇന്ന് ജീവവംശങ്ങളില്‍ ഏറ്റവും ഔന്നിത്യത്തില്‍ നില്‍ക്കുന്ന സ്ഥാനമാണ്‌ ‘ഹോമോസാപ്പിയന്‍സ്’ അഥവാ നമ്മുടെ മനുഷ്യവംശത്തിന്റേത്. നിലവിൽ ഭൂമിയുടെ ആധിപത്യത്തിനുവേണ്ടി മറ്റു ജീവവംശങ്ങളില്‍നിന്ന് മനുഷ്യന് യാതൊരു വെല്ലുവിളിയും നേരിടേണ്ടിവരുന്നില്ല. ബുദ്ധിവൈഭവത്തിന്‍റെ കാര്യത്തില്‍ രണ്ടാം സ്ഥാനത്തിനുവേണ്ടി ‘വാദിക്കുന്ന’ ജീവിവര്‍ഗ്ഗത്തിനുപോലും നമ്മുടെ അഞ്ചുവയസുകാരന്‍റെ അത്ര ബുദ്ധിവികാസമേയുള്ളു. എന്നാല്‍, ചരിത്രാതീതകാലത്ത് ഇതായിരുന്നില്ല സ്ഥിതി. നാല്‍പത് സഹസ്രാബ്ദങ്ങള്‍മുമ്പ് ഭൂമിയുടെ ആധിപത്യത്തിലേക്ക് മനുഷ്യനെ നയിച്ച ഒരു പരോക്ഷയുദ്ധം നടന്നിരുന്നു. നമ്മുടെ ‘കസിന്‍സ്സു’മായി നടന്ന അതിജീവനത്തിന്‍റെ ഒരു യുദ്ധം!

കുരങ്ങുവംശത്തില്‍ നിന്നു ആധുനികമനുഷ്യനിലേക്കുള്ള പരിണാമം നൂറു തലമുറകള്‍ കൊണ്ടുണ്ടായതല്ല. ക്രോമാഗ്നൺപോലുള്ള വിവിധ നരവംശങ്ങളിലൂടെ ആയിരക്കണക്കിന് തലമുറകള്‍ കൊണ്ടുസംഭവിച്ചതാണ്. ഇതില്‍ ഒരുഘട്ടത്തില്‍ ലോകത്തിന്‍റെ ഗതിയെതന്നെ നിര്‍ണയിച്ച ഒരു സഹവര്‍ത്തിത്വം (co-existence) നടന്നത്രേ. ഇന്ന് ആഫ്രിക്കന്‍ആനയും ഇന്ത്യന്‍ആനയും സഹവര്‍ത്തിക്കുന്നതുപോലെ ഹോമോസാപ്പിയന്‍സ് ഏതാണ്ട് അയ്യായിരം വര്‍ഷക്കാലം മറ്റു രണ്ടു വ്യത്യസ്തമായ ജനതതികലോടൊപ്പം സഹവര്‍ത്തിച്ചിരുന്നു. നിയാണ്ടര്‍ത്താല്‍, ഹോമോസാപ്പിയന്‍, ഡെനിസോവന്‍… ഈ മൂന്നു ഹോമിനുകളില്‍ ആര് ഭൂമി ഭരിക്കും എന്ന് നിര്‍ണയിച്ച നാളുകള്‍! ആ മത്സരത്തിന്‍റെ വിജയിയാരെന്നു ഇന്ന് നമുക്കറിയാം 🙂. അതിലേക്ക് നയിച്ച കാരണങ്ങളിലേക്ക് പിന്നീടു കടക്കാം.

നിയാണ്ടര്‍ത്താലുകള്‍..! ആകാരം മനസ്സില്‍ സങ്കല്‍പ്പിക്കുമ്പോള്‍ സ്വാഭാവികമായും പ്രകടമാവുന്ന ഒരു രൂപമുണ്ട്. നമ്മുടെ തന്നെ മുരളുന്ന… വൃത്തിഹീനമായ, വിരൂപമായ, രോമാവൃതമായ ഒരു പതിപ്പ്. നിയാണ്ടര്‍ത്താല്‍ മനുഷ്യന്‍റെ അവശിഷ്ടങ്ങള്‍ ആദ്യമായി കണ്ടെത്തിയത് 1856-ല്‍ ജര്‍മ്മനിയിലെ നിയണ്ടാറിലെ ഒരു ഗുഹയിലാണ്. ആ താഴ്വരയില്‍ പാറപൊട്ടിക്കുന്നവര്‍ അപ്രതീക്ഷിതമായി ഒരു ഗുഹയില്‍ കുറെ അസ്ഥികളും തലയോട്ടിയും കണ്ടെത്തി. Dr. യോഹന്‍ കാള്‍ ഫ്യുള്‍റോത്ത് എന്ന ഗവേഷകനാണ് ഈ തലയോട്ടിയുടെ പ്രത്യേകതകള്‍ ആദ്യം ശ്രദ്ധിച്ചത്. അതുവരെകണ്ടിട്ടുള്ള അസ്ഥികളില്‍ നിന്നൊക്കെ വ്യത്യസ്തം. മസ്തിഷ്കത്തിനു സാധാരണമനുഷ്യന്‍റെതിനേക്കാള്‍ 20 ശതമാനം വലിപ്പം കൂടുതല്‍. ഫോസ്സില്‍ പഠിച്ചപ്പോള്‍ സാങ്കല്‍പ്പികരൂപഘടന വളരെ വ്യത്യസ്തം. ആധുനികമനുഷ്യന്‍റെയും പൂര്‍വികരുടെയും കണ്ണികള്‍ കൂട്ടിയോജിപ്പിക്കുമ്പോള്‍ ചേര്‍ക്കാന്‍ പറ്റാതെ പോയൊരു കണ്ണി. അതാണ്‌ നിയാണ്ടര്‍ത്താല്‍ മനുഷ്യന്‍.

എങ്ങനെയാണ് ക്രമത്തില്‍ നടന്നുവന്നിരുന്ന പരിണാമത്തില്‍നിന്ന് നിയാണ്ടര്‍ത്താല്‍ വേറിട്ടത്?
ആഫ്രിക്കന്‍ ഭൂഖണ്ഡമായിരുന്നു നമ്മുടെ പൂര്‍വികരില്‍ നിന്ന് നമ്മിലേക്കുള്ള പരിണാമത്തിന്‍റെ കേന്ദ്രം. എന്നാല്‍ ഒരു പരിണാമത്തിന്റെ ഒരു വേളയിൽ, ഏകദേശം നാലുലക്ഷം വര്‍ഷങ്ങള്‍ക്കുമുമ്പ്, ഒരുവിഭാഗം പൂര്‍വികര്‍ ആഫ്രിക്കയില്‍നിന്ന് യൂറോപ്പിലേക്കും പശ്ചിമേഷ്യയിലേക്കും പ്രയാണംചെയ്തു വാസമുറപ്പിച്ചു. അക്കൂട്ടരുടെ പിന്നീടുള്ള പരിണാമം അവിടങ്ങളിലെ കാലാവസ്ഥയ്ക്ക് അനുയോജ്യമായ രീതിലായിരുന്നു. കാലക്രമേണ അവരില്‍നിന്നു നിയാണ്ടര്‍ത്താല്‍ വംശമുണ്ടായി. ഇത്തരത്തിൽ ഇവരില്‍ ചിലര്‍ ഇതിനോടകം സൈബീരിയയില്‍ വരെയെത്തി താവളമുറപ്പിച്ചിരുന്നു. അങ്ങനെ സൈബീരിയയില്‍ നിയാണ്ടര്‍ത്താലോളം പ്രശസ്തമല്ലാത്ത ഡെനിസോവന്‍ വംശവുമുണ്ടായി. 2008ല്‍ ഡെനിസോവ ഗുഹ എന്നറിയപ്പെട്ട ഒരു സൈബീരിയന്‍ ഗുഹയില്‍ നിന്നു ‘X-Woman’ എന്ന് അറിയപ്പെടുന്ന ഒരു യുവതിയുടെ നാല്പതിനായിരം വര്‍ഷം പഴക്കമുള്ള ഫോസ്സില്‍ കണ്ടെടുത്തു.

ഇന്നു ചുരുളഴിയാത്ത രഹസ്യമായി നിയാണ്ടര്‍ത്താല്‍ മനുഷ്യന്‍ മാറുന്നത് രണ്ടു ചോദ്യങ്ങള്‍ മൂലമാണ്.

നിയാണ്ടര്‍ത്താലും മനുഷ്യരും തമ്മില്‍ വംശസങ്കരം ഉണ്ടായിട്ടുണ്ടോ ?!

2010ല്‍ മോളിക്യുലാര്‍ ബയോളജിയില്‍ നടന്ന പഠനത്തില്‍ ഒരു കൗതുകകരമായ വസ്തുത കണ്ടെത്തുകയുണ്ടായി. ഇന്നു ആഫ്രിക്കന്‍ ശിഖരത്തില്‍നിന്ന് ജനിച്ചവരൊഴികെ മറ്റെല്ലാ മനുഷ്യവര്‍ഗ്ഗവും (അത് യൂറോപ്യനായാലും ഏഷ്യനായാലും) പൂര്‍ണമായും ഹോമോസാപ്പിയന്‍സ് അല്ല. ഏകദേശം 1 മുതൽ 4 ശതമാനംവരെ അവരുടെ ജനിതകഘടന നിയാണ്ടര്‍ത്താലുകളുടേതാണ്. അതായത് ‘നമ്മളിലൂടെ’ നിയാണ്ടര്‍ത്താലുകള്‍ ഇന്നും ജീവിക്കുന്നുവെന്ന് അര്‍ത്ഥം! ഇതെങ്ങനെയാണ് സംഭവിച്ചതെന്ന് നോക്കാം.
നിയാണ്ടര്‍ത്താലുകളുടെ പൂര്‍വികര്‍ നാലുലക്ഷം വര്‍ഷങ്ങള്‍മുന്‍പ് ഏഷ്യയിലും യൂറോപ്പിലുമൊക്കെയായി കുടിയേറിപാര്‍ക്കുകയുണ്ടായെന്ന് പറഞ്ഞല്ലോ. അതിന് ഒരു മൂന്നുലക്ഷം വര്‍ഷങ്ങള്‍ക്ക് ശേഷം… അതായത് ഇവിടെനിന്ന് ഒരുലക്ഷം വര്‍ഷംമുന്‍പേ, പരിണാമത്തിന്‍റെ അന്തിമഘട്ടത്തില്‍ എത്തികഴിഞ്ഞിരുന്ന ‘മനുഷ്യരില്‍’ ഒരു വിഭാഗം ആഫ്രിക്കയില്‍നിന്ന് വിട്ടുപോന്നു. പിന്നെയും ആയിരകണക്കിനു വര്‍ഷങ്ങള്‍ക്ക്ശേഷം അവര്‍ ക്രമേണ നിയാണ്ടര്‍ത്താലുകള്‍ വസിക്കുന്ന പ്രദേശങ്ങളില്‍ എത്തിച്ചേര്‍ന്നു. ഇന്ന് നീഗ്രോകള്‍, കോക്കോസോയിയന്‍, മംഗോളിയന്‍ എന്നീ മൂന്ന് അടിസ്ഥാനവര്‍ഗ്ഗങ്ങളായി നാം ചേരിതിരിയാന്‍ കാരണമായതില്‍ പ്രധാനപങ്ക് വഹിച്ച ഒരു കൂടികാഴ്ച! അയ്യായിരത്തിലധികം വര്‍ഷം അത് നീണ്ടുനിന്നു.

ഈ അയ്യായിരവര്‍ഷക്കാലത്തെ കൃത്യമായ ചരിത്രം നമുക്ക് അജ്ഞാതമാണ്. എങ്കിലും ചേര്‍ത്തുവായിക്കുമ്പോള്‍ ഊഹാപോഹത്തിന്‍റെ അടിസ്ഥാനത്തില്‍ നരവംശശാസ്‌ത്രജ്ഞര്‍ പറയുന്ന കഥ കേള്‍ക്കാന്‍ രസകരവുമാണ്‌.
“ഏഷ്യന്‍ സമതലത്തിലെത്തിയ മനുഷ്യന്‍ വിസ്മയകരമായ ആ കാഴ്ച കണ്ടു. കുറെ കുറിയമനുഷ്യര്‍. പരുക്കന്‍ മുഖം… ഉന്തിയതും വലിപ്പമേറിയതുമായ നെറ്റിതടം… വിരിഞ്ഞുവീതിയാര്‍ന്ന മാറിടം… ബലിഷ്ടമാര്‍ന്ന ശരീരപ്രകൃതി… ഒരു ശരാശരി മനുഷ്യനെക്കാള്‍ ആറിഞ്ച് പൊക്കകുറവ്. അവനെപ്പോലെ… എന്നാല്‍ അവനില്‍നിന്ന് വിഭിന്നമായ ഒരു വര്‍ഗ്ഗം! അപരിചിതര്‍, എന്നാലോ… പരിചിതര്‍! KIN AFFECTION അഥവാ വർഗ്ഗസ്നേഹം. മനുഷ്യരെ ആദ്യമായി കാണുന്ന ചിമ്പാന്‍സികളിലും ഇത്തരമൊരു ഭാവമാറ്റം കാണാന്‍ കഴിയും. അതിന്‍റെ എത്രയോ ഇരട്ടിയാവും മനുഷ്യരും നിയാണ്ടര്‍ത്താലുകളും കണ്ടുമുട്ടുമ്പോള്‍ ഉണ്ടായിട്ടുണ്ടാവുക?!”

നിലവിലെ കണ്ടെത്തലുകളനുസരിച്ച് നിയാണ്ടര്‍ത്താലുകള്‍ക്ക് ഭാഷയുടെ ജീനുകളും, സംഗീതാദികലകളിലും ഉപകരണനിര്‍മ്മാണത്തിലും നൈപുണ്യവുമുണ്ടായിരുന്നു. സ്വാഭാവികമായും ഇതൊക്കെ നിയാണ്ടര്‍ത്താലുകളെ മനുഷ്യര്‍ക്ക് ആകര്‍ഷണീയരാക്കിയിരുന്നിരിക്കാം. സൗന്ദര്യം ആപേക്ഷികമല്ലേ? നിയാണ്ടര്‍ത്താലുകളെ വിരൂപരായി ആധുനികലോകം കണ്ടെന്നുകരുതി പൌരാണികരുടെ കാഴ്ചയില്‍ അവര്‍ അനുരൂപരായിക്കൂടെന്നില്ലല്ലോ. സമാനരീതിയില്‍, ബൗദ്ധികപരമായും സാങ്കേതികപരമായും ഉയര്‍ന്നനിന്ന പുരാതനമനുഷ്യര്‍ നിയാണ്ടര്‍ത്താലുകള്‍ക്കും ഒരു പുതുമയായിരുന്നു. (ഋഷ്യശ്രിംഗന്‍ ആദ്യമായി വൈശാലിയെ കണ്ടുമുട്ടിയതുപോലെ 😉).

അങ്ങനെ ഹോമോസാപ്പിയനുകളും നിയാണ്ടര്‍ത്താലുകളും ഒരുമിച്ചു വസിക്കാന്‍ ആരംഭിച്ചിരുന്നിരിക്കണം. അത്തരമൊരു അവസ്ഥയില്‍ സംജാതമായേക്കാവുന്ന ഒരു വര്‍ഗ്ഗസങ്കരം നടന്നത്രേ. രണ്ടു സമാനവര്‍ഗങ്ങള്‍ തമ്മില്‍ സംഗമിക്കുമ്പോള്‍ പൊതുവേ രണ്ടു തരത്തിലുള്ള സന്തതിപരമ്പരയുണ്ടാവുന്നു. എന്നാല്‍ അതിലൊരു പരമ്പര താരതമ്യേന മറ്റേതിനെക്കാള്‍ അനായാസമായി സൃഷ്ടിക്കപ്പെടുന്നു. കോവര്‍കഴുതയും ഹിന്നിയും തന്നെ ഉദാഹരണം. അത്തരത്തില്‍ നമ്മുടെ X-Y Chromosome പഠനപ്രകാരം നിയാണ്ടര്‍ത്താല്‍അംശം നമ്മുടെ DNAയില്‍ കടന്നുകൂടിയത് ഹോമോസാപ്പിയന്‍പുരുഷനും നിയാണ്ടര്‍ത്താല്‍ സ്ത്രീയും തമ്മിലുണ്ടായ സംഗമം മൂലമാണ്. നിയാണ്ടര്‍ത്താല്‍ സ്ത്രീയെ ബാലാല്‍ക്കാരമായി പ്രാപിക്കുക എന്നത് ഹോമോസാപ്പിയന് ഒരുതരത്തില്‍ അസാധ്യവുമാണ്. കാരണം നിയാണ്ടര്‍ത്താല്‍വംശത്തിനായിരുന്നു ഹോമോസാപ്പിയനെക്കാള്‍ ശരീരബലം എന്ന് ഫോസ്സില്‍പഠനം തെളിയിക്കുന്നു (അത് സ്ത്രീയാണെങ്കില്‍കൂടി). അതിനാല്‍ അവിടെയന്ന് നടന്നത് അപൂര്‍വമായ സഹവര്‍ത്തിത്വം തന്നെയാവണം എന്ന് നരവംശശാസ്‌ത്രജ്ഞര്‍ അഭിപ്രായപ്പെടുന്നു.

എന്തുതന്നെയായാലും ഇത്തരമൊരു ജനിതകസങ്കരം ഹോമോസാപ്പിയന്‍സ് അഥവാ മനുഷ്യര്‍ക്ക്‌ ഗുണത്തേക്കാളേറെ ദോഷമാണുണ്ടാക്കിയതെന്ന് പഠനങ്ങള്‍ പറയുന്നു. നിയാണ്ടര്‍ത്താലുകളുടെ നല്ല ഗുണങ്ങളടങ്ങിയ ജീനുകളൊന്നും കിട്ടിയില്ലെന്നു മാത്രമല്ല, ഏകദേശം പന്ത്രണ്ടോളം ഗുണങ്ങളില്‍ അവര്‍ നമ്മെ ഒന്നുകൂടി ബലഹീനരാക്കുകയും ചെയ്തു! അലര്‍ജി ബുദ്ധിമുട്ടിക്കുന്നുണ്ടോ? കുറ്റം നമ്മുടേതല്ല, ജനിതകഗണിതപ്രകാരം കുറഞ്ഞത് നാലു തലമുറയിലെങ്കിലും നമ്മുടെ പൂര്‍വികര്‍ നിയാണ്ടര്‍ത്താലുകളും ഡെനിസോവനുകളുമായിയൊക്കെ നടത്തിയ ഇണചേരലിന്‍റെ ഫലമാണത്. അലര്‍ജി മാത്രമല്ല, നൈരാശ്യം, ചര്‍മ്മാര്‍ബുദം, സ്ട്രോക്ക്, ഹൃദ്രോഗം, ടൈപ്പ് 2-പ്രമേഹം മുതലായവയ്ക്കൊക്കെ നാം കൂടുതല്‍ Vulnerable ആയത് ഇത്തരം അന്യജീനുകളുടെ കടന്നുകയറ്റതാലാണത്രേ!നിയാണ്ടര്‍ത്താലുമായി നടന്ന അവസാനത്തെ സംഗമം 46000 വര്‍ഷം മുന്‍പായിരുന്നത്രേ. അതിനുശേഷം നിയണ്ടാര്‍ത്താലുകള്‍ക്ക് എന്ത് സംഭവിച്ചു എന്നത് ഇന്നും ഉത്തരമില്ലാത്ത ചോദ്യമാണ്. നിയണ്ടാര്‍ത്താല്‍ വീണെടുത്ത് ഹോമോസാപ്പിയന്‍ വാണതെങ്ങനെ?!

നിയാണ്ടര്‍ത്താലുകളുടെ നാശം:

ദിനോസറുകളുടെ നാമാവശേഷം പോലെതന്നെ ഇന്നും ചുരുളഴിയാത്ത രഹസ്യമായി മാറുന്ന ഒരു ചോദ്യമാണിത്. ഹോമിനുകളില്‍ മനുഷ്യര്‍ മാത്രം ചരിത്രാതീകാലത്തെ അതിജീവിച്ചതെങ്ങനെ?
നരവംശശാസ്‌ത്രം മുന്നോട്ടുവയ്ക്കുന്ന ഒരു ഉത്തരമിതാണ്. നിയാണ്ടര്‍ത്താലുകള്‍ ഒറ്റയടിക്ക് ഭൂമുഖത്തുനിന്ന് തുടച്ചുനീക്കപ്പെട്ടതല്ല. ശരാശരി കേവലം നാല്‍പതുവര്‍ഷം മാത്രം ആയുസുണ്ടായിരുന്ന നിയാണ്ടര്‍ത്താല്‍മനുഷ്യര്‍ ഹോമോസാപ്പിയനില്‍ ലയിച്ചുചേര്‍ന്നു ഇല്ലാതാവുകയായിരുന്നു. അങ്ങനെ നാല്‍പതിനായിരം വര്‍ഷങ്ങള്‍ മുന്‍പ് അവസാനനിയാണ്ടര്‍ത്താലും ഭൂമുഖത്തുനിന്നു വേരറ്റുപോയി. എന്നാലിന്നു പരക്കെ അംഗീകരിക്കപ്പെട്ടിട്ടുള്ളതായ കാരണം കാലാവസ്ഥാമാറ്റത്തോടു അവര്‍ക്ക് പൊരുത്തപ്പെടാന്‍ കഴിഞ്ഞില്ല എന്നുള്ളതാണ്.

ആഫ്രിക്കയില്‍നിന്നു വിഭിന്നമായ തണുത്തകാലാവസ്ഥയ്ക്ക് അനുയോജ്യമായി നിയാണ്ടര്‍ത്താലുകളുടെ ത്വക്ക് അനുരൂപപ്പെട്ടിരുന്നു. അതിനാല്‍ ശിലായുഗത്തില്‍ പെട്ടെന്നുണ്ടായ ഒരു ഉഷ്ണകാലത്തോട് അവര്‍ക്ക് പൊരുത്തപ്പെടാനായില്ല. നേരെമറിച്ച് ബൗദ്ധികമായി ഉയര്‍ന്നുനിന്ന ഹോമോസാപ്പിയന്‍ ചൂടിനും തണുപ്പിനും അനുയോജ്യമായ തന്ത്രങ്ങള്‍ അവരുടെ ജീവിതരീതിയില്‍ ആവിഷ്ക്കരിച്ചിരുന്നു. മറ്റൊന്നായി പറയുന്നത് അവരുടെ ഭക്ഷണരീതിയാണ്. ഹിമയുഗത്തില്‍ ഉത്ഭവിച്ച മാമ്മത്തുകളെപോലെയുള്ള വലിയ മൃഗങ്ങളെ മാത്രം വേട്ടയാടിയിരുന്ന അവര്‍ ഭക്ഷണത്തില്‍ വൈവിധ്യം കൊണ്ടുവരാഞ്ഞതുമൂലം പോഷകകുറവിനാല്‍ വലഞ്ഞു. കൂടാതെ കാലാവസ്ഥാവ്യതിയാനം കൂടിവന്നപ്പോള്‍ ഇത്തരം മൃഗങ്ങൾ അപ്രത്യക്ഷമാവുകയും ചെയ്തു. എന്നിട്ടും അവര്‍ക്ക് മറ്റൊരു ഭക്ഷണക്രമം സ്വീകരിക്കാനായില്ല. കാര്യങ്ങള്‍ മനസിലാക്കി അതിനനുശ്രിതമായി പ്രവര്‍ത്തിക്കാനുള്ള ചിന്താശേഷിയൊന്നും മനുഷ്യനോളം നിയാണ്ടര്‍ത്താല്‍ തലച്ചോറിന് ഉണ്ടായിരുന്നില്ലത്രേ. ഇതും അവരുടെ നാശഹേതുവായി.

‘Survival of the fittest’ എന്ന ഡാര്‍വിന്‍തത്വത്തില്‍ വിശ്വസിക്കുന്നവരുമുണ്ട്. നിയാണ്ടര്‍ത്താലിന്‍റെ നാശത്തിന് നേരിട്ടോ പരോക്ഷമായോ മനുഷ്യര്‍ കാരണമായിട്ടുണ്ടാകാം. സ്വതവേ വിഷാദമൂകരായ നിയാണ്ടര്‍ത്താലിനെക്കാള്‍ സാമൂഹ്യവിനിമയശേഷിയും നമുക്കായിരുന്നു. അതിനാല്‍ ഹോമോസാപ്പിയന്‍ സംഘങ്ങള്‍ തമ്മില്‍ മികച്ച സഹകരണവുമുണ്ടായിരുന്നത്രേ. നിയാണ്ടര്‍ത്താല്‍ ഹോമോസാപ്പിയനും നേരിട്ട് മല്ലയുദ്ധത്തിലേര്‍പ്പെട്ടാല്‍ തീര്‍ച്ചയായും ജയം നിയാണ്ടര്‍ത്താലിനാവും. എന്നാൽ സംഘബലംകൊണ്ടും ബൗദ്ധികൂര്‍മതകൊണ്ടും നിയാണ്ടര്‍ത്താല്‍വംശത്തെ ബഹുദൂരം പിന്നിലാക്കുന്ന ഹോമോസാപ്പിയന്‍സ് അവരെ ഒരു യുദ്ധത്തില്‍ മുച്ചൂടും മുടിച്ചുകളഞ്ഞിരിക്കുവാനുള്ള സാധ്യതയും തള്ളികളയാന്‍ കഴിയില്ല. മനുഷ്യര്‍ ചെല്ലൂന്നെടത്തൊക്കെ ആധിപത്യം സ്ഥാപിക്കാനായി എന്തുംചെയ്തിരുന്ന ഒരു പാരമ്പര്യവും നമുക്കുണ്ടെല്ലോ 🙂

ഇത്തരം അപൂര്‍ണ്ണമായ ഉത്തരങ്ങളായി നമ്മുടെ ‘കസിന്‍സ്’ നമുക്ക് മുന്നിലുള്ളപ്പോഴും, അവര്‍ക്ക് ലഭിക്കാതെ പോയ ആ ഭാഗ്യം… പൂര്‍വികരിലൂടെ നമുക്ക് ലഭിച്ച അതിജീവനത്തിന്‍റെ വരപ്രസാദം… തമ്മിൽ വെട്ടിയും കൊന്നും, പ്രകൃതിയുമായി കൊമ്പുകോര്‍ത്തും എറിഞ്ഞുടച്ചുകൊണ്ട് ‘അതിബുദ്ധിമാനായ’ ഹോമോസാപ്പിയന്‍റെ പിന്‍മുറക്കാർ ഇന്ന് നാശത്തിന്റെ വഴിയിലേക്ക് പ്രയാണം ചെയ്തുകൊണ്ടേയിരിക്കുന്നു.

BY Jithin Jacob Koshy
Palathully

Palathully

ഇന്റര്‍നെറ്റില്‍നിന്നുംശേഖരിക്കുന്നഇത്തരംപോസ്റ്റുകളുടെയഥാര്‍ത്ഥരചയിതാവിന്‍റെപേര്അവസാന ഭാഗത്ത്‌ഉണ്ടാവും . തെറ്റെങ്കില്‍ juliuskuthukallen@gmail.com എന്നവിലാസത്തില്‍അറിയിക്കുക .
Palathully
Image

ഒരു അഭിപ്രായം പറയൂ