കൃത്രിമ ദന്ത വിഭാഗത്തിലെ ഏറ്റവും നൂതന ചികിത്സാ രീതിയായ ഡെന്റല്‍ ഇംപ്ലാന്‍റ് കളെ ക്കുറിച്ചുള്ള ചില പ്രാഥമിക വിവരങ്ങളാണ് ഈ കുറിപ്പില്‍…
കൃത്രിമ പല്ലുകളെ രണ്ടായി തിരിക്കാം ഉറപ്പിച്ചു വെക്കുന്ന തരത്തിലുള്ള പല്ലുകളും രോഗികൾക്ക് തന്നെ ഊരി എടുക്കാവുന്ന തരം പല്ല് സെറ്റ്കളും.
ഇതില്‍ ഊരി മാറ്റുന്ന സെറ്റുകള്‍ എല്ലാ ദിവസവും വായില്‍ നിന്ന് പുറത്തെടുത്തു ബ്രഷ് ചെയ്തു വൃത്തിയാക്കി വീണ്ടും ഉപയോഗിക്കുന്ന തരമാണ്. ചെലവ് കുറവാണെങ്കിലും ഉറപ്പിച്ചു വെക്കാത്തതിനാല്‍ താരതമ്യേന സൌകര്യപ്രദമല്ല.
ഉറപ്പിച്ചു വെക്കുന്ന പല്ല് സെറ്റ്കള്‍ സാധാരണയായി രോഗിക്ക് സ്വയം ഊരിയെടുക്കാന്‍ പറ്റാത്ത, അഥവാ ഊരി മാറ്റേണ്ട ആവശ്യം ഇല്ലാത്ത തരത്തിലാണ്. ഒരിക്കല്‍ വായില്‍ പിടിപ്പിച്ചു കഴിഞ്ഞാല്‍ ചവക്കുമ്പോഴും പല്ല് തേക്കുമ്പോഴും എല്ലാം ഒരു സാധാരണ പല്ല് പോലെ തന്നെ ആയിരിക്കും അനുഭവപ്പെടുക.
ഒരു പല്ല് ഉറപ്പിച്ചു വെക്കണമെങ്കില്‍ തൊട്ടടുത്തുള്ള ഉറപ്പുള്ള ഏതെങ്കിലും ഒരു ഭാഗത്ത്‌ നിന്നും സപ്പോര്‍ട്ട് എടുക്കേണ്ടി വരും. അത്തരത്തില്‍ കൃത്രിമ പല്ലിനെ സപ്പോര്‍ട്ട് ചെയ്യാന്‍ തക്ക ഉറപ്പുള്ള രണ്ടു ഭാഗങ്ങളാണ് അടുത്തുള്ളത്. ഒന്ന് ഒരു നഷ്ടപ്പെട്ട പല്ലിന്‍റെ സ്ഥാനത്തിനു ഇരു വശത്തുമായി നിൽക്കുന്ന സ്വാഭാവികമായ പല്ലുകള്‍ . മറ്റൊന്ന് താഴെ ഉള്ള താടിയെല്ല്… ഇങ്ങനെ തൊട്ടടുത്ത പല്ലുകളുടെ സപ്പോര്‍ട്ട് ഉപയോഗിച്ച് കൃത്രിമ പല്ല് വെക്കുന്ന രീതി ആണ് സാധാരണ ബ്രിഡ്ജ് എന്ന് പറയുന്നത് താടിയെല്ലില്‍ നിന്നും സപ്പോര്‍ട്ട് എടുക്കാനുള്ള രീതിയാണ് ഡെന്റല്‍ ഇംപ്ലാന്‍റ് കള്‍
ഈ രണ്ടു ചികിത്സകളും (കൃത്യമായ രീതിയില്‍ ചെയ്‌താല്‍ ) താരതമ്യേന വളരെ ഉയര്‍ന്ന വിജയ ശതമാനം ഉള്ളവയാണ്… എങ്കിലും ബ്രിഡ്ജ് നെ അപേക്ഷിച്ച് ഡെന്റല്‍ ഇംപ്ലാന്‍റ് കള്‍ കൂടുതല്‍ മികച്ചതായാണ് പരിഗണിക്കപ്പെടുന്നത്…
ഇംപ്ലാന്‍റ് ചികിത്സക്ക് പല ഘട്ടങ്ങളുണ്ട്… ആദ്യമായി treatment planning ന്‍റെ ഭാഗമായുള്ള പരിശോധനകള്‍ ആണ്… ഇംപ്ലാന്‍റ് താടിയെല്ലിന്‍റെ ഉള്ളില്‍ സ്ഥാപിക്കുന്നത് ഒരു ചെറിയ ശസ്ത്രക്രിയ വഴിയാണ്… അതുകൊണ്ട് തന്നെ ഇംപ്ലാന്‍റ് ചെയുന്നതിന് മുന്‍പായി പൊതു ആരോഗ്യസ്ഥിതി മനസ്സിലാക്കാന്‍ വേണ്ട പരിശോധനകള്‍ വേണ്ടി വരും. രക്തസമ്മര്‍ദം , പ്രമേഹം തുടങ്ങിയവ എല്ലാം നിയന്ത്രണ വിധേയമാവണം. ഹൃദയം വൃക്ക, കരള്‍ തുടങ്ങിയ മറ്റു സുപ്രധാന അവയവങ്ങളുടെ തകരാറുകള്‍ക്ക് ചികിത്സയില്‍ ഇരിക്കുന്ന രോഗികളില്‍ കൂടുതല്‍ പരിശോധനകളും ചിലപ്പോള്‍ അതാത് വിദഗ്ധരുടെ ഉപദേശവും തേടേണ്ടതുണ്ട്
സര്‍ജറി എന്ന വാക്ക് തന്നെ പലര്‍ക്കും പേടിയാണ്… ഞാന്‍ ഇതിനെ ആവശ്യത്തില്‍ കൂടുതല്‍ നിസ്സാരവല്‍ക്കരിക്കാനോ മഹത്വവല്‍ക്കരിക്കാനോ ഉദ്ദേശിക്കുന്നില്ല… ഏതാണ്ട് പല്ല് പറിക്കുന്നതിന് സമാനമായ റിസ്ക്‌ ഉള്ള ഒരു ലഘു ശസ്ത്രക്രിയ (മൈനര്‍ സര്‍ജറി) ആണത്. രോഗിയെ പൂര്‍ണമായി മയക്കേണ്ട ആവശ്യം സാധാരണ ഉണ്ടാവാറില്ല… മിക്കപ്പോഴും ഇംപ്ലാന്‍റ് വെക്കുന്ന ഭാഗം മാത്രം തരിപ്പിച്ചാല്‍ മതിയാവും…
പൊതു ആരോഗ്യസ്ഥിതി വിലയിരുത്തിക്കഴിഞ്ഞാല്‍ അടുത്തതായി വേണ്ടത് ഇംപ്ലാന്‍റ് സ്ഥാപിക്കേണ്ട താടിയെല്ലിന്‍റെ ഭാഗത്തിന്റെ പരിശോധനയാണ്. എല്ലിന്‍റെ അളവും ഘടനാപരമായ സവിശേഷതകളും മനസ്സിലാക്കാന്‍ x-ray എടുത്തു നോക്കേണ്ടതുണ്ട് . ചില സാഹചര്യങ്ങളില്‍ താടിയെല്ലിലെ ഞരമ്പ്‌ കളുടെയും രക്തക്കുഴലുകളുടെയും മറ്റു സുപ്രധാന ഭാഗങ്ങളുടെയും സ്ഥാനം കൃത്യമായി വിലയിരുത്തുന്നതിന് സ്കാനിംഗ്‌ പരിശോധനയും വേണ്ടിവന്നേക്കാം. ഇത്തരം പരിശോധനകള്‍ വഴി ഇംപ്ലാന്‍റ് വെക്കേണ്ട സ്ഥാനവും വെക്കേണ്ട ഇംപ്ലാന്‍റ് ന്‍റെ വലിപ്പവും എല്ലാം നിര്‍ണയിച്ച ശേഷം സര്‍ജറി സമയത്ത് നമ്മള്‍ മുന്‍കൂട്ടി നിശ്ചയിച്ച ദിശയില്‍ തന്നെ ആണ് ഇംപ്ലാന്‍റ് വെക്കുന്നത് എന്നുറപ്പിക്കാന്‍ സര്‍ജിക്കല്‍ ടെമ്പ്ലേറ്റ് എന്ന് പറയുന്ന ഒരു അച്ച് അഥവാ വാര്പ്പ് മാതൃക കൂടി ചിലപ്പോള്‍ ഉണ്ടാക്കാറുണ്ട്.
മേല്പ്പറഞ്ഞ എല്ലാ തയ്യാറെടുപ്പുകള്‍ക്കും ശേഷം ആണ് ചികിത്സ തുടങ്ങുന്നത്. ആദ്യ ഘട്ടത്തില്‍ മുന്‍പ് സൂചിപ്പിച്ച പോലെയുള്ള ഒരു ചെറിയ ശസ്ത്രക്രിയ വഴി താടി എല്ലില്‍ കൃത്യമായ സ്ഥാനത്തു ഇംപ്ലാന്‍റ് വെച്ച് പിടിപ്പിച്ച് തുന്നലിട്ട ശേഷം മുകളില്‍ ഒരു ഡ്രെസിംഗ് കൂടി കൊടുക്കുന്നു. രോഗിക്ക് അന്ന് തന്നെ വീട്ടില്‍ പോകാന്‍ സാധിക്കും. ഏതാനും ദിവസത്തിന് ശേഷം തുന്നല്‍ എടുക്കുകയും ആവശ്യമെങ്കില്‍ ഒരു താത്കാലിക പല്ല് സെറ്റ് വെക്കുകയും ചെയ്യാം.
അനുകൂല സാഹചര്യമാണെങ്കില്‍ പല്ല് പറിക്കുന്ന സമയത്ത് തന്നെ ഇംപ്ലാന്‍റ് താടിയെല്ലിനുള്ളില്‍ വെക്കാറുണ്ട്
താടിയെല്ലിനുള്ളില്‍ വെക്കുന്ന ഇംപ്ലാന്‍റ് ഏതാണ്ട് ഒരു സ്ക്രൂ വിന്‍റെ ആകൃതി ആയിരിക്കും (മറ്റു തരത്തിലുള്ളതും ഉണ്ട്) ഇതു അസ്ഥി രോഗ വിഭാഗത്തില്‍ നിന്നും ദന്ത വൈദ്യത്തിലേക്ക് എത്തിയ ഒരു ചികിത്സ ആണ്. അപകടങ്ങളിലും മറ്റും എല്ലുകള്‍ക്ക് പൊട്ടല്‍ സംഭവിച്ചാല്‍ ശസ്ത്രക്രിയ നടത്തി റോഡുകളോ പ്ലേറ്റ്കളോ സ്ക്രൂകളോ ഒക്കെ ഉപയോഗിച്ച് അതു നേരെ ആക്കുന്നതിനുള്ള ചികിത്സാ രീതികള്‍ കേട്ട് പരിചയം ഉണ്ടാവും എന്ന് കരുതട്ടെ. ഇതിനു സമാനമായ ഒന്നാണ് കൃത്രിമ ദന്തങ്ങള്‍ വെക്കുന്നതിനു താടിയെല്ലിലേക്ക് ഇംപ്ലാന്‍റ് വെക്കുന്നത്
വളരെ ശുദ്ധീകരിച്ച ടൈറ്റാനിയം എന്ന ലോഹം ആണ് ഇംപ്ലാന്‍റ് നിര്‍മ്മിക്കാന്‍ ഉപയോഗിക്കുന്നത്. ഇതു ശരീര കലകളോട് വളരെ സൌഹര്‍ദ്രപരമായ ഒന്നാണ് (bio compatibility ) ഇതു ശരീരകലകള്‍ക്ക് ഉള്ളില്‍ വെച്ചാല്‍ ശരീരം അതിനെ ഒരു അന്യ വസ്തു ആയി കണക്കാക്കുകയില്ല. ഇംപ്ലാന്‍റ് താടിയെല്ലിനുള്ളില്‍ വെച്ച് കഴിഞ്ഞാല്‍ സാധാരണ പോലെ തന്നെ മുറിവുണങ്ങുന്നു. ഏതാണ്ട് ഒരു മൂന്നോ നാലോ മാസം കഴിയുമ്പോഴേക്കും അസ്ഥികള്‍ ഇംപ്ലാന്‍റ് നു മേലേക്ക് വളര്‍ന്നു പിടിച്ചിട്ടുണ്ടാവും
ഇങ്ങനെ മൂന്നോ നാലോ മാസങ്ങള്‍ കഴിഞ്ഞു വീണ്ടും ഒരു x-ray എടുത്തു പുരോഗതി വിലയിരുത്തുന്നു. അടുത്തതായി വീണ്ടും ചെറുതായി തരിപ്പിച്ചു ഇംപ്ലാന്‍റ് നു മുകള്ഭാ ഗത്ത്‌ വളര്‍ന്നു വന്ന മോണ തുറക്കുന്നു. സ്വാഭാവിക ദന്തനിരയില്‍ ഉള്ളത് പോലെ തന്നെ മോണ യുടെ ആകൃതി ശരിയാക്കി എടുക്കുകയാണ് അടുത്ത ഘട്ടത്തില്‍. കൃത്രിമ പല്ലുകള്‍ക്ക് കാഴ്ച്ചയില്‍ സ്വാഭാവികമായ പല്ലുകളുടെ അതെ ഭംഗി കിട്ടാനും മോണയുടെ ആരോഗ്യം നിലനിര്‍ത്താനും ഈ ആകൃതി വളരെ പ്രധാനമാണ്. ഇതിനായി ജിന്ജിവല്‍ ഫോര്‍മര്‍ എന്ന ഒരു ഭാഗം ഇംപ്ലാന്‍റ് നു മുകളില്‍ പിടിപ്പിച്ചു മോണ ഇതിനു ചുറ്റും സ്വാഭാവികമായി വളര്‍ന്നു വരാന്‍ ഉള്ള സമയം കൊടുക്കുന്നു….
അടുത്ത ഘട്ടത്തില്‍ ചെയാനുള്ളത് ഈ ഇംപ്ലാന്‍റ് നു മുകളില്‍ കൃത്രിമ പല്ല് നിര്‍മ്മിക്കുക എന്നതാണ്. ഇതിനായി ആവശ്യമായ അളവുകള്‍ എടുക്കുന്നു. തൊട്ടടുത്ത പല്ലുകളുടെയും എതിര്‍വശത്തെ പല്ലുകളുടെയും എല്ലാം അളവുകളും ഫോട്ടോകളും എല്ലാം വേണ്ടി വരും. പല്ലിന്‍റെ സ്വാഭാവിക നിറവും ചവക്കുമ്പോള്‍ എതിര്‍വശത്തെ പല്ലിനോടുള്ള കടിയും കൃത്യമായി കിട്ടാന്‍ വേണ്ടി ആണിത്. മേല്പ്പറഞ്ഞ അളവുകള്‍ ഉപയോഗിച്ച് വിദഗ്ദ്ധരായ ഡെന്റല്‍ ടെക്നീഷന്‍ മാരുടെയും ആധുനിക സാങ്കേതിക വിദ്യകളുടെയും സഹായത്തോടെ കൃത്യമായ നിറത്തിലും ആകൃതിയിലും ഉള്ള കൃത്രിമ ദന്തങ്ങള്‍ നിര്മ്മിക്കുന്നു. ഇതു സാഹചര്യത്തിനനുസരിച്ച് നേരിട്ട് ഇംപ്ലാന്‍റ് നു മുകളില്‍ ഒരു സ്ക്രൂ ഉപയോഗിച്ച് പിടിപ്പിക്കുകയോ അല്ലെങ്കില്‍ അബട്ട് മെന്‍റ് എന്ന ഒരു ഭാഗം സ്ക്രൂ ചെയ്തു പിടിപ്പിച്ചതിനു ശേഷം അതിനു മുകളില്‍ ക്രിതൃമപല്ല് പ്രത്യേക പശ ഉപയോഗിച്ച് ഒട്ടിക്കുകയോ ചെയ്യാം
വിത്യസ്ത തരം ഇംപ്ലാന്‍റ് കള്‍ നിലവിലുണ്ട് അവയില്‍ ചികിത്സാ രീതികളിലും ചില വിത്യാസങ്ങള്‍ ഉണ്ട്. അവയില്‍ ഒന്ന് മാത്രമാണ് മുകളില്‍ വിവരിച്ചിരിക്കുന്നത്.
ഇംപ്ലാന്‍റ് ചികിത്സ യുടെ ഗുണങ്ങള്‍ പരിശോധിക്കാം…. ഇംപ്ലാന്‍റ് ചികിത്സ പ്രചാരത്തില്‍ വരുന്നതിനു മുന്‍പ് പല്ലുകള്‍ ഉറപ്പിച്ചു വെക്കാന്‍ ഏതാണ്ട് പൂര്‍ണമായും ആശ്രയിച്ചിരുന്നത് മുകളില്‍ സൂചിപ്പിച്ച ബ്രിഡ്ജ് എന്ന രീതിയെ ആണ്. അതുകൊണ്ട് തന്നെ ഏതാണ്ട് എല്ലായ്പ്പോഴും ബ്രിഡ്ജ് ഉം ആയി താരതമ്യപ്പെടുത്തിക്കൊണ്ട് ആണ് ഇംപ്ലാന്‍റ് കളെപ്പറ്റി ചര്‍ച്ച ചെയ്യാറ്.
ബ്രിഡ്ജ് നെ അപേക്ഷിച്ച് നിരവധി ഗുണങ്ങള്‍ ഇംപ്ലാന്‍റ് നു അവകാശപ്പെടാന്‍ ഉണ്ട് എങ്കിലും ഏറ്റവും പ്രധാനപ്പെട്ട ഒന്ന് രണ്ടു കാര്യങ്ങള്‍ മാത്രമേ ഈ ലേഖനത്തില്‍ ചര്‍ച്ച ചെയ്യുന്നുള്ളൂ …
ബ്രിഡ്ജ് എന്ന രീതിയില്‍ നഷ്ടപ്പെട്ട പല്ലിന്‍റെ മോണക്ക് പുറത്തുണ്ടായിരുന്ന ഭാഗം മാത്രമേ പുനസ്ഥാപിക്കുന്നുള്ളൂ. ഇംപ്ലാന്‍റ് ലാവട്ടെ മോണക്ക് അകത്തുണ്ടായിരുന്ന വേരിനെ കൂടി പുനസ്ഥാപിക്കുന്നു. ഇതു പ്രായോഗികമായി എന്ത് വിത്യാസമാണ് ഉണ്ടാക്കുക എന്ന ചോദ്യം സ്വാഭാവികമായും ഉയര്‍ന്നു വരാം ഒരു ഉദാഹരണം പറഞ്ഞാല്‍ കുറച്ചു കൂടി വ്യക്തമായെക്കും….
ഒരു കുന്നിന്‍ മുകളില്‍ കുറെ മരങ്ങള്‍ ഉണ്ടെന്നു കരുതുക.. മരങ്ങളുടെ വേരിനെ പിടിച്ചു നിര്‍ത്തുന്നത് മണ്ണാണ്. മണ്ണിനെ പിടിച്ചു നിര്‍ത്തുന്നത് മരങ്ങളുടെ വേരുകളും. മരങ്ങള്‍ ഇല്ലാതാവുമ്പോള്‍ മണ്ണൊലിപ്പ് ഉണ്ടാകുന്നു. ഒരു തവണ മണ്ണൊലിപ്പ് ഉണ്ടായി ക്കഴിഞ്ഞാല്‍ പിന്നീട് അവിടെ മരങ്ങള്‍ വെച്ച് പിടിപ്പിക്കുന്നത് കൂടുതല്‍ ബുധിമുട്ടാകുന്നു കുന്നിന്‍റെ ഏതെങ്കിലും ഒരു ഭാഗത്തെ മരങ്ങള്‍ വെട്ടി മാറ്റിയാല്‍ ആ ഭാഗത്ത്‌ ഉണ്ടാകാവുന്ന മണ്ണൊലിപ്പ് തൊട്ടടുത്ത ഭാഗത്തെ മരങ്ങളുടെ വേരിനെ ദുര്‍ബലമാക്കാന്‍ ഇടയുണ്ട്.
ഈ മരങ്ങളെ പല്ലുകളുമായും മണ്ണിനെ താടിയെല്ലുമായും താരതമ്യപ്പെടുത്താം. പല്ലുകള്‍ നഷ്ടപ്പെട്ടു കഴിഞ്ഞാല്‍ പല്ല് നിന്നിരുന്ന താടിഎല്ലിന്‍റെ ഭാഗങ്ങള്‍ സാവധാനം ക്ഷയിക്കുന്നു. ഇതു തൊട്ടടുത്തുള്ള പല്ലുകളെ ദുര്‍ബലമാക്കുന്നു … താടിയെല്ലില്‍ ഉണ്ടാകുന്ന തേയ്മാനം വര്‍ധിക്കുന്നതനുസരിച്ച് അവിടെ കൃത്രിമ പല്ലുകള്‍ വെച്ച് പിടിപ്പിക്കുന്നത് കൂടുതല്‍ ബുധിമുട്ടാകുന്നു.
ഇംപ്ലാന്‍റ് ചികിത്സയില്‍ മുന്‍പ് സൂചിപ്പിച്ച പോലെ എല്ലിനുള്ളില്‍ കൃത്രിമ വേര് വെക്കുമ്പോള്‍ ഈ അസ്ഥിക്ഷയം ഒരു പരിധി വരേ തടയാന്‍ സാധിക്കുന്നു… പക്ഷെ ബ്രിഡ്ജ് രീതിയിലാവട്ടെ മോണക്ക് മുകളിലുള്ള ഭാഗം മാത്രം പുനസ്ഥാപിക്കപ്പെടുന്നുളൂ എന്നതിനാല്‍ താഴെ സ്വാഭാവികമായ രീതിയില്‍ തന്നെ അസ്ഥിക്ഷയം സംഭവിച്ചു കൊണ്ടിരിക്കും
ബ്രിഡ്ജ് നെ അപേക്ഷിച്ച് ഇംപ്ലാന്‍റ് നു ഉള്ള മറ്റൊരു സുപ്രധാന ഗുണം ഇതു തൊട്ടടുത്ത പല്ലുകളെ സ്വാഭാവിക അവസ്ഥയില്‍ തന്നെ നിലനിര്‍ത്തിക്കൊണ്ടുള്ള ചികിത്സ ആണ് എന്നതാണ്. അതെ സമയം ബ്രിഡ്ജ് രീതിയിലാവട്ടെ തൊട്ടടുത്തുള്ള പല്ലുകള്‍ ക്രൌണ്‍ ചെയ്യുക ( ടോപ്‌ ചെയ്യുക/കവര്‍ ചെയുക എന്നൊക്കെ സാധാരണ ഭാഷയില്‍ ) ആവശ്യമാണ്‌. ഇതിന്‍റെ ഭാഗമായി പല്ലിന്‍റെ കുറച്ചു സ്വാഭാവിക ഭാഗങ്ങള്‍ രാകി കളയേണ്ടി വരും. ഇങ്ങനെ രാകിക്കളയുന്ന ഭാഗങ്ങള്‍ ചികിത്സയുടെ അടുത്ത ഘട്ടത്തില്‍ കൃത്രിമ വസ്തുക്കളാല്‍ പുനസ്ഥാപിക്കപ്പെടുന്നുണ്ട് എങ്കില്‍ പോലും അവ സ്വാഭാവിക രീതിയില്‍ സംരക്ഷിക്കപ്പെടുന്ന ഇംപ്ലാന്‍റ് ചികിത്സയാണ് കൂടുതല്‍ മികച്ചതായി കണക്കാക്കപ്പെടുന്നത്.
ഇംപ്ലാന്‍റ് ചികിത്സയുടെ ദോഷ വശങ്ങള്‍ :-
താരതമ്യേന ഉയര്‍ന്ന ചിലവും കൂടുതല്‍ ശ്രദ്ധയും വൈദഗ്ദ്ധ്യവും ആവിശ്യമാണ് എന്നതും ശസ്ത്രക്രിയാ രീതികളോടുള്ള ഭയവും കാരണം ഇപ്പോഴും നമ്മുടെ നാട്ടില്‍ ഇംപ്ലാന്‍റ് ചികിത്സക്ക് അല്പം പ്രചാരം കുറവാണ്. എങ്കിലും അടുത്ത കാലത്ത് കൂടുതല്‍ ആളുകള്‍ ഇംപ്ലാന്‍റ് ചികിത്സക്ക് തയ്യാറാവുന്നുണ്ട് .
എഴുതിയത് : Ashokraj Vm
കടപ്പാട് :Prasanth Manohar Suhana Thoppil
